Honky dory

Jæja það er sælan, eitt stig úr tveimur síðustu leikjum!  Hefðu átt að vera fjögur, en svona er lífið í boltanum það þýðir ekkert að að væla enda hlutverk boltans að gefa lífinu aukið gildi ekki auka þjáningar. Ég verð samt að segja að spila 4-5-1 með Rooney einan á toppnum var fáranlegt, okkur vantar fleiri sóknarmenn t.d. Martin sem við lánuðum til Rangers, einhvern til að hlaupa línuna.

Njósnir til verndar öryggis sjálfstæðisflokksins eru ofarlega á baugi þessa dagana og gaman að heyra frá eina sagnfræðingnum sem hefur skoðað gögnin, að um leyniþjónustu sjálfstæðisflokksins, á kostnað ríkisins, hafi verið að ræða.  Það verður gaman að fylgjast með úrvindu þessa máls, tilraunir þær sem þjóðskjalavörður hefur haft uppi til að hindra aðgang að gögnunum eru vægast sagt aumkunarverðar, í  upplýstu upplýsingasamfélagi.  Það er nefnilega svo að á árunum sem möndulveldin tvö hafa verið í stjórn þá hefur verið unnið gott og markvisst starf í því að bæta stjórnsýsluna, reyndar arfleið Jóns Baldvins (EES), auka rétt borgaranna en menn stíga aftur til kaldastríðstímanns án þess að blikka hvað þá blikna. 

 

 

Skóli - bolti - líf - vinna

Skólinn er byrjaður og ég er strax á eftir, í verkefnum, lestri og hugsun.  Enda ekki búinn að kaupa neinar  bækur, hvað þá lesa þær, er þetta nú hægt fyrir mann í mastersnámi?  Lokaverkurinn(verkefni) er það sem liggur fyrir og ég er varla byrjaður að hugsa, en það kemur, vonandi.

Boltinn rúllar og heldur manni við efnið, eina tengingin við raunveruleikann.  Fimm alvöruleikir, fimm sigrar, gott mál.  Stór leikur um helgina.

Nú er SuperNova liðið og maður neyðist líklega til að fara að sinna konunni þegar Magna nýtur ekki lengur við í þeim málum. Hún ætlar á morgun í Smáralindina til að sjá goðið með fullum stuðningi mínum (ManUtd og  Arse á sama tíma) og Magni er auðvitað nátengdur mér eða frændi Sigurðar Arnar frænda míns.

Ég byrjaði í nýrri vinnu um síðustu mánaðamót, færði mig úr skipum í flugvélar.  Það tekur á margt að læra og gera en mér líst bara vel á, tilbreyting hristir alltaf upp í manni.

9 stig 10-2

Boltinn byrjar vel, við vinnum og helstu keppinautar tapa stigum. Það er samt ástæða til að hafa áhyggjur af hópnum, hann er ekki stór og meiðsli og bönn hafa áhrif.  Það lítur allt út fyrir að Hargreaves komi ekki og tíminn er að renna út til leikmannakaupa.  Nóg um það þó að boltinn sé mikilvægur, heimsins stærsta sápuópera. 

Þá er fleira í gangi en bolti, í dag velta menn sér upp úr því hvort að það hefði breytt einhverju með Kárahnjúkana hvort ein skýrsla hefði verið kynnt alþingismönnum og almenningi eður ei og jafnvel talað um að fresta að láta renna í Hálsalón! Jafnvel Steingrímur J., minn maður, var að predika að ganga frá þessu öllu saman og nota sem safn mistaka!  Hvað með álverið og uppbygginguna á Austfjörðum?? það er ekki hægt að halda uppi dreifðribyggð í landinu með hörrækt einni saman og háleitum hugsjónum.  Það sem þarf að hugsa um er ekki hvort stíflurnar haldi/leki eður ei, sérfræðingarnir er búnir að svara því og alþingismenn hafa almennt séð ekki þá tæknikunnáttu sem þarf til að svara því. Heldur afhverju þessi skýrsla kallaði á viðbrögð Landsvirkjunar yfirleitt, átti ekki að vera búið að spyrja þessara spurninga af okkar heimsmælikvarða sérfræðingum??? 

Ég hef meiri áhyggjur af áhrifum þessa eilífa gráts vinstrielítunnar úr 101 Reykjavík á ímynd og framgang félagshyggjunnar en  lekum stíflum og  að  setja   mela, fossa og einhver smá grös  undir vatn.   Það má ekki gleyma því að  við  Íslendingar  erum fyrst og fremst  praktískir tækifærissinnar ekki djúpir hugsuðir sem vilja lifa á rósrauðu skýi úr sambandi við raunveruleikann, við erum sem sagt Framsóknarmenn. 

Ómar 

p.s. Kjósum Magna. 

1sti í fótbolta og Latibær

Þá er komið að því, löng  og erfið bið á enda, boltinn byrjaður að rúlla. Það gerðist ekkert sem ekki var við að búast í gær Púlararnir náðu jafntefli á vafasamri vítaspyrnu og Arse í vandræðum með duglegt lið.   Það verður gaman að sjá hvernig gengur hjá okkar mönnum í dag Scholes og Rooney verða með áður en bannið tekur gildi, meira ruglið, og enn nokkuð um meiðsli.  Það verður spennandi að sjá hvernig gengur með að fá Hargreaves, mér líst vel á hann og það á að skvísa Bæjara hressilega með stórum upphæðum til að fá hann.

Við fórum í bæinn í gær með börnin og tókum þátt í Latabæjarhlaupi Glitnis, mikið fjör og mikið af fólki.  Börnin skemmtu sér feikivel og það fyrsta sem Stefán Mar sagði í morgun ,,eigum við ekki að fara út að hlaupa?" góð hugmynd en ég er enn aumur í öxlunum eftir gærdaginn.  Reyndar voru allir nema ég sofnaðir fyrir kl. níu

Marteinslaug

Jæja komin heim, skriðum í Grafarholtið um hálfeitt í nótt eftir níu og hálfan tíma á leiðinni frá Fáskrúðsfirði.  Ferðin gekk vel börnin þæg og  umferð skikkanleg.  Næst á dagskrá þetta venjulega að taka upp úr töskum þvo þvotta o.þ.h.   Gott frí hefðum mátt vera heppnari með veðurspár, þ.e. þær hefðu mátt standast oftar en annars bara mjög gaman.

Bjarmaland - heimáleið

Við komum hér í gær og krakkarnir hafa fengið góða útrás í leik með frændsystkinum sínum.  Valli sýndi okkur byggingarreit þeirra Rauðhyltinga.  Planið í dag er að fara suður á bóginn með stoppi á Höfn og sjá svo til kannski förum við alla leið heim, það er komin viss þreyta í mannskapinn og þá er best að drífa sig heim.

 

Kárahnjúkar - Þrándarstaðir

Við yfirgáfum öryggið og rólegheitin á Ketilsstöðum og fórum til fjalla.  Stefán Mar hefur saknað frænda sinna mikið og talar út í eitt um strákana.  En við fórum í efra og skoðuðum herlegheitin og það  verður að segjast að það hefði mátt sökkva meira af þessu án mikils skaða.  Við fórum efri leiðina til byggða í gegnum Brú.  Gist var á Þrándarstöðum hjá Sigga og Guðnýju í góðu yfirlæti.  Fimmtudagsmorgun var ansi blautur og kaldur þegar við tókum okkur upp og fórum í neðra og erum nú í Bjarmalandi hjá Valla og Elsu.

Ártún

Fórum í Egilstaði hittum Ingibjörgu og Bjarka, fórum síðan í Malarvinsluna og hittum Dodda, fórum í Útmannasveit og komum við í Ártúni og á Hjaltastað. Grill á Ketilstöðum, rólegur dagur.

Sjá myndir www.sjos.blogspot.com

Syðri Vík - Ketilsstaðir

Við fórum og skoðuðum Botnstjörn og gengum um skóginn í Ásbyrgi, Stefán fékk að halda í ólina hjá Skúla og stóð sig vel.  Seinnipartinn lögðum við á stað til Vopnafjarðar og fórum Öxarfjarðarheiði þegar við nálguðumst Vopnafjörð skellti á okkur skúr og ákveðið var að hringja í Túra í Syðri Vík og falast eftir svefnpokaplássi, sem gekk eftir. Við fórum til Höskuldar í kaffi og mat og síðan í hádegismat daginn eftir.  Þegar við ætluðum að fara í sund fór Stefán Mar að æla og við hættum við.  Stefnan var svo sett á Hérað og farið í Ketilsstaði til Beggu frænku.  Þar er allt á kafi í heyskap og við látum fara lítið fyrir okkur til að trufla sem minnst, eins og er þá er planið að vera hér fram á miðvikudag og fara í einhverja túra héða.

Laugar - Ásbyrgi

Það góða við sumarfrí er að maður þarf ekki alltaf að halda sig við plönin,  við fórum snemma frá Laugum til Húsavíkur og hittum Línu frænku og skoðuðum bílaflotan hjá Jóni, gleymdist að taka myndir en svaka flottir.  Síðan sammæltumst við um að hitta Ingibjörgu og Bjarka við Mývatn, nánar til tekið  í Vogafjósinu og ákvaðum að fara með þeim að Dettifossi og síðan í Ásbyrgi.  Það var nokkur belgingur í logninu og varla stætt við Dettifoss en frábært í Ásbyrgi mjög mannmargt og spennandi.  Stefnan tekin á Vopnafjörð á morgun

Myndir